بدون عنوان .......................

مش لاقى عنوان قعدت افكر اختار عنوان ايه بس ملقيتش
فقولت اعرض الموضوع ونختار ليه عنوان مع بعض
اهو ندردش ونفضفض شويه
------------------------------------
اصل فيه اولاد طالعين اليومين دول أل بيقولو ان احنا معندناش حريه ولا ديموقراطيه. لسمح الله
ده بردو اسمه كلام ؛

طيب انا هثبت ليهم اننا عندنا حريات مش موجوده فى اى دوله فى العالم وبالادله
واللى معترض يقولى اى مكان فى العالم بيتمتع بالحريات دى

1- تستطيع ان تركن سيارتك فى اى مكان على الرصيف الايمن او الايسر او حتى فى منتصف الطريق
لو كنت مستعجل ولن يعترض احد على حريتك فى اغلاق الطريق
حتى لو تعطلت مصالحهم فهما كمان اعتادو ان يفعلو زيك ,وبعدين هى الدنيا طارت ولا وراهم الديوان يعنى

2- تستطيع ان تركن عربيتك طوليا او عموديا او بالورب والكل سعيد بحريته

3 - تستطيع ان تركن صف اول او تانى او تانى مكرر ... براحتك حتى لو كنت راكن صف تالت
وقفلت على حد .مش مشكله ما هو كمان راكن صف تانى وقافل على ناس صف اول
والصف الاول قافل على الناس اللى راكنه على الرصيف ؛ حريه يا راجل ..

4- للتاكسيات والميكروباصات حريه الوقوف فى اى لحظه وفى اى مكان من الطريق
لالتقاط راكب طايش سواء على جانب الطريق او منتصفه او مطلع كوبرى او منزل نفق
وكل الشارع بيحترم حريتهم ؛تقدر تعمل كده فى امريكا ؟

5-تستطيع انت ايضا ان تستمتع ببعض حريات سائقى الميكروباص فيمكنك ان تقف فى اى مكان فجأه
وتفتح باب سيارتك على وسعه لانزال واحد صاحبك علشان لقى كشك عايز يشترى منه علبه سجاير او باكو لبان بيطرقع

6- لو لقيت الاشاره حمرا مفيش مشكله عدى.. الاشارات معموله علشان الشكل الحضارى بس
ولو جيت على نفسك ووقفت فى الاشاره اعمل حسابك تزمر بشكل متواصل وهستيرى اول ما الاشاره تفتح
لان الناس اللى قدام ممكن يكونوا نامو شويه

7- تقدر تسوق باعلى سرعه فى اى مكان ووسط الناس اللى ماشيين على رجليهم
اصلهم يستاهلو مش راكبين عربيات ليه ؟ انت شوفت كده فى اى دوله اوربيه مش بقولك حريه

8- الحرب خدعه، كل السواقين بيتوقعوا انك تعدى من شمالهم فى الطريق الصحراوى
عدى انت من اليمين وملكش دعوه ده حقق الدستورى

10- حتى اللى ماشيين على رجليهم لهم الحريه انهم يمشو فى نص الطريق ويقفوا يسلموا على بعض فى اى مكان
ولا يشغلهم الكلاكسات اصلهم بيمارسوا حقهم فى الحريه ,

11- من حق اى واحد انه يعمل مطب صناعى قدام بيته زى ما هو عاوز مش مشكله العربيات تتكسر
وسع تفكيرك ؛

12- من حقك ان تعدى الشارع فى اى وقت ومن اى مكان
ولو كان فيه سياره جايه اعمل نفسك مش واخد بالك وعدى براحتك خالص
ما تخافش هو هيقف؛ هو اهبل يدوسك ويودى نفسه فى داهيه ؟

13- وطبعا فى الشارع الكل ليه الحق فى استخدام قاموس الشتائم التذكارى وبرضه محدش بيعترض على الحريات دى

فيه اكتر من كده حريات بزمتك انت شوفت الحريات دى فى اى مكان فى العالم ودى حاجه واحده بس من الحريات اللى بيتمتع بها المواطن المصرى

وجايين يقولوا ان مفيش حريه فى مصر بلاش الافكار الهدامه دى
---------------------------------------------
شر البليه ما يضحك مش كده ؟؟؟؟؟؟؟؟؟
تفتكروا ده يتحطلو عنوان ايه